الأحد، 13 نوفمبر، 2011

عن جمعة 18 نوفمبر و موقف الاسلاميين

في البداية انا مش بفهم في السياسة اوي ولا قارئة جامدة في السياسة ولا حاجة..والكلمتين اللي هقولهم دول مجرد وجهة نظر ورايي اللي شايفاه(اللي بتمني بالمناسبة انه يطلع غلط)
نرجع بالزمن لورا شوية كده..هو ايه حكاية حمعة 18 نوفمبر دي؟
الشيخ حازم ابو اسماعيل دعي لجمعة 28 اكتوبر وكانت جمعة المطلب الوحيد وهو تسليم السلطة للمدنيين في موعد اقصاه ابريل 2012
كان حاصل تعتيم اعلامي رهيب عن الجمعة دي..والاعلام اللي اتكلم عنها قالوا جمعة العزل السياسي وكان الثوار بيطالبوا بقانون الغدر
كان هيحصل اعتصام واتاجل ليوم 18 نوفمبر عشان تكون اجازة العيد خلصت..وعشان الحشد يكون افضل..وعشان كمان القوي الاخري اللي عايزة تنضم للاعتصام


وفي الفترة دي طلعت لينا وثيقة السلمي اللي باختصار المجلس ناقص يقول فيها..انا مجلسكم الاعلي..ما اريكم الا ما اري وما اهديكم الا سبيل الرشاد
وطبعا كل القوي رفضتها لانه المجلس العسكري كانه بئا من اساسيات الحياة في مصر.
اللي عايزة اتكلم فيه موقف الاسلاميين..(اللي انا منهم بالمناسبة)
الاخوان والسلفيين والتيار الاسلامي عامة رفض الوثيقة رفضا تاما من حيث المبدا اصلا وهددوا طبعا بالنزول للشوارع يوم 18 نوفمبر لو الوثيقة متلغتش من المجلس العسكري
ايه بئا اللي معجبنيش في موقفهم؟.. اولا طبعا .الوثيقة دي المجلس يبلها ويشرب ميتها مش هنختلف علي كده..ثانيا..جمعة 18 نوفمبر مش عشان نرفض وثيقة السلمي..الجمعة دي عشان تسليم السلطة للمدنيين وده مطلبها الوحيد
وكمان الاسلاميين عمالين ينتقدوا السلمي ويطالبوا باقالته ..علي اساس انه بيعمل كده من نفسه
واحنا عارفين كويس انه مجردة اداة في ايد المجلس العسكري
ليه النقد ميتوجهش للمجلس العسكري..ليه كله للسلمي ؟

وبعد كده نقول انا هننزل يوم الجمعة عشان نرفض بس الوثيقة دي اللي يبئا عبث بجد
لما المجلس يطلع موضوع الوثيقة عشان القوي السياسة تتشغل وعشان يشتت مطلب يوم 18 من تسليم السلطة لرفض وثيقة واحنا كاسلاميين نشرب الطعم ده يبئا عبث
المجلس واضح من المؤشرات انه الجمعة دي رعبته لان لها مطلب واحد مفيش غيره
فقال اما اعمل حاجة كده تحول مسار الجمعة لحاجة تانية..وييجي يوم الخميس بليل يطلع بيان انه لغي الوثيقة او يوم الجمعة بليل
وقال يعني نزولا علي رغبة الجماهير المحتشدة في ميدان التحرير
مش عاجبني في موقف التيار الاسلامي اللي ظاهرلي انهم انجروا للعبة الوثيقة..المفروض منتشتتش ..جمعة 18 لتسليم السلطة واعلان معاد انتخابات رئاسة..المجلس كان ادامه فرصه كبيرة يحدد معاد انتخابات الرئاسة من يوم 28 اكتوبر ومعملهاش..طب ده ليه؟؟..ولسه برضه متطمنين ليه؟
باختصار اللي اعرفه انه المجلس بيدور علي مصلحته وبس..ومصلحته اننا كاسلاميين منوصلش للحكم ومنكونش اغلبية في البرلمان
وان حصل وخدنا اغلبية..تبئا عدد وبس..وبان طبعا اما المجلس قال لا متحلموش تشكلوا الحكومة انا برضه اللي هشكلها..وهعد معاكم وانتو بتكتبوا الدستور..كل ده ومفروض نصبر عليه ومامنين ليه؟؟
الجمعة اللي جاية لو منجحتش انا هيجيلي احباط شديد واحتمال افقد بعديها الامل في الثورة وفي البلد وفي ناس كتير
والثورة لو فشلت يتحمل فشلها القوي السياسة كلها
القوي اللي خافت انتخابات بدري تحصل احسن الاسلاميين ييجو..وقالوا ظلم العسكر ولا حكم الاسلاميين
وقوي اسلامية ساعدت في تخدير الشارع وسكتت علي تجاوزات عملها المجلس..ولو كانوا اتكلموا كان زمان الثورة والكبس الثوري لسه في قوته

اخر كلمة هقولها
في رايي اللي ناول يوم الجمعة عشان يرفض وثيقة السلمي يبئا بلاش ينزل احسن لانه ده مش هدف الجمعة دي..واللي هينزل برضه ساعتين ويروح بلاش برضه.عشان  مفروض الاجراء الثوري اللي يتاخد يكون شديد مش مجرد مظاهرة نهاتي فيها مع نفسنا والمجلس مطنش
وفي النهاية
انا اتمني كواحدة من شباب التيار الاسلامي انه رايي يطلع غلط ورؤيتي للي يحصل تطلع فاشلة والقيادات يطلع رايها سليم ويكونوا عاملين حسابهم علي غدر المجلس..ومنتفاجئش ان التاريخ بئا سنة 52 تاني ..رغم ان الشواهد بتقول غير كده
ربنا يستر !

السبت، 4 يونيو، 2011

مليونية تطبيق الشريعة والحماية الدولية

بداية كده..كنت اعدة علي تويتر لقيت حد متوت لينك لصفحة علي الفيس بوك..ا يوليو مليونية تطبيق الشريعة في التحرير
طبعا بما اني توجهاتي اسلامية(بس انا مش اخوان علي فكرة ) عجبتني الفكرة وقلت قشطة والله فكرة جامدة
بس بعد كده اعدت افكر شوية..مليونية تطبيق شريعة؟!..في التحرير!!..يعني ننزل في التحرير نهتف الشعب يريد تطبيق الشريعة
وانا عارفة كويس انه مطلب زي ده لو الاخوان والسلفيين نزلوا حشدو لجمعة زي دي هتعدي المليون مش مليون بس ولنا في الاستفتاء عبرة(اللي انا قلت فيه لا بالمناسبة :)  )..طب وبعدين؟.الاعداد دي كلها لما تنزل بمطلب زي ده هيكون ايه رد الفعل..طبعا باقي القوي السياسة هتتخض..بس دول يتخضو مش مشكلة..المشكلة بئا في الاخوة المسيحيين دول مش هيتخضو بس لا كمان هيترعبو..وكمان ممكن يفكرو ينزلو بمظاهرات مضادة وانه كده الاسلاميين عايزين يفرضو ارادتهم علي الشعب  .وبعضهم وبكرر بعضهم ينزل مظاهرات وهتاف الشعب يريد حماية دولية..وتقلب خناقات بين الطرفين ..وتحصل فتنة طائفية بس المرة دي بجد ممكن منعرفش نلمها دي مش واحدة اسلمت او اتنصرت هنعد نتخانق عليها ده شكل الدولة في المستقبل.
طب ثواني كده ..نرجع لورا شوية..هو مين اصلا اللي دعي للجمعة دي؟.. الاجابة: جهة غير معلومة.
واشمعنا دلوقتي..طب ما احنا عندنا انتخابات برلمانية جاية..وباذن الله تكون نزيهة( يا رب يعني ومنكونش بنحلم او بيتضحك علينا )..وساعتها الشعب هيختار ممثلين برلمان بيعبروا عنه..ودول اللي هيكتبو الدستور اللي هيحدد شكل الدولة في الفترة اللي جاية..يبئا ليه اصلا ننزل مظاهرات ونطالب بحاجة ممكن تعمل قلق..ومين ليه مصلحة انه موضوع زي ده يتفتح قبل الانتخابات بشهرين؟..ومعلوم اوي انه ممكن يتسبب بهرج جامد في البلد
انا مش بشكك في نية اللي دعي للجمعة دي..ممكن تكون كانت نيته حسنة انه عايزين يطبق الشريعة من وجهة نظره شايفه مطلب ممكن يلاقي اجماع شعبي وقال ما ننزل التحرير يعبر عن راينا ونشوف هنجمع اد ايه
وممكن بئا نلجأ لنظرية المؤامرة اللي غرقانين فيها .زانه يكون مقصود انه موضوع زي دي يتم الدعوة ليه من جهة عايزة توقع ومن مصلحتها يحصل فوضي..ولعلمكم هي جهات كتير اختارو اي حاجة تعجبكم منهم
وتكون النتيجة بعد حالة الهرج في الفوضي..تاجيل الانتخابات..او فرض احكام عرفية..او اجراءات تانية منعرفش هي ايه هياخدها المجلس العسكري
رايي بئا ان الموضوع لازم كلنا نقف ادامه..لانه مش مريح بالمرة.
 لانه موضوه زي تطبيق الشريعة ده ده مستقبل وشكل دولة زي ما قلت قبل كده..ما ينفعش يتاخد بمظاهرات مليونية في التحرير ..لو هنتكلم بجد بئا ..والموضوع اتطرح فعلا يا يتعمل استفتاء علي الشعب في الموضوع يا اما مجلس الشعب المنتخب من الشعب يناقشه ..لكن ننزل نستعرض في التحرير بحاجة زي دي ممكن تجيبلنا بلاوي احنا في غني عنها..وكمان لازم الشعب يوافق علي حاجة زي دي ده مش تهرييييج
.واكتر ناس لازم يتصدو ليه هم الاسلاميين..يعني الاخوان والسلفيين لانه حتي لو كان متوافق مع مطالبهم ومع رؤيتهم لشكل الدولة الا انه المفاسد اللي هتيجي من واره هتكون اكبر
ممكن حد يقولي انتي مزوداها وده ايفنت اهبل وخلاص..هقوله من الاخر السلفيين والاخوان قوتهم علي الشارع مش في النت
يعني لو وانا مش بتكلم هنا علي مشايخ السلفية او قيادات الاخوان
يعني الصفحة اخر مرة شفتها كان في 3884 تقريبا..الناس دي لو نزلت اشتغلت في الشارع وبمساعدة اصحابهم ومعارفههم هيعملو المليونية وهينزلو..وتخوفاتي ذكرتها فوق 
ربنا يستر والموضوع ميكونش بجد وتطلع تخوفاتي دي في الهوا
تحديث مهم :
الشيخ ياسر برهامي احد مشايخ الدعوة السلفية في اسكندرية قال موقفهم المليونية دي وانه رافضها وانهم مش هيطلعو فيها 
وكمان الصفحة كدبت وقالت علي احد الشيوخ وهو الشيخ عبد الرحمن منصور انه مؤيد وطلعو كدابين..
وكمان الشيخ عبد المقصود وده من كبار شيوخ السلفية نبه علي الناس انها متنزلش المظاهرة
بصراحة كنت متاكدة انه ده هيكون موقف مشايخ السلفية انهم مش بالغباء انهم يعملوا حركة زي دي :)

والاخوان اصلا كمان مش طالعين 


وكمان واضح انه مش حد متدين اصلا وشكله كده شغل امن دولة والصورة دي تثبت من طريقة رده علي الاخ اللي نصحه انهم بلاش يعملو المظاهرة
http://on.fb.me/kLdNpC


الكلام النهائي بئا المظاهرة دي مقصود بيها فتنة طائفية واستفزاز للمسيحيين وبقية القوي السياسية
تاني حاجة شكلهم امن دولة وزي ما قلت واضح من الرد في الصورة اللي فاتت
كده اتطمنا انه هيكون عددهم قليل ..بس الخوف انهم ينزلو يخربو ويعملو حاجة ويقولك دول بتوع تطبيق الشريعة..وبقول تاني..ربنا يستر

الأحد، 22 مايو، 2011

ثائر مثارش علي حاجة يتحدث عن المجلس


في البداية دي اول مرة ادون فيها عن اي حاجة..بس حسيت اني عايزة اتكلم عن المجلس بما ان السياسة خربت دماغي من بعد الثورة
ايه اللي حصل..بن علي اتنحي واملنا بئا في السما..ايفنت ع الفيس بوك.يوم 25 ناس نزلت ..وتتوالي الايام وشهداء  ومصابين وموقعة جمل..وفي النهاية 11\2\2011 اتنحي مبارك..طبعا مرورا بان الداخلية اتبخرت ونزل بدالها الجيش ودلوقتي مسك البلد كلها..وانا بتابع كل ده ومن ورا شاشات التليفزيون والنت لاني بنت ولم يسمح لي بالمشاركة في الثورة رغم تاييدي الكامل ليها..عشان كده ثائر مثارش علي حاجة
من اول ما الجيش مسك  في الاول فرحت وقلت كويس..وكنت طالعة بيه السماء.الجيش مننا ..مش الداخلية اللي هوايتها تعذب في الناس وبس
لكن شوية شوية ..لقيت حجات غريبة بتحصل..الموضوع بدا لما قريت ان واحد اسمه عمرو البحيري اتمسك لما في كان في مظاهرة عشان نشيل المدعو شفيق..واتحكم عليه عسكريا خمس سنين..ايه ده؟..هو الجيش بيعمل كده ليه؟..مش الجيش حامي الثورة..جايز اندس وسطهم بلطجية والجيش خد الحابل بالنابل..و ان الجيش في جزء فيه فساد وكلنا عارفين ودي صور الفساد..طب جايز المجلس مش عارف؟؟!!
اسئلة كتير دارت في بالي شالت مني الارتياح الكامل للمجلس..مش قادرة اخونهم ومش قادرة اثق ثقة عمياء
طبعا بعدها توالت المحاكمات العسكرية الكتير..وفض اعتصام 9 مارس..وعلي صبحي لما اتقبض عليه..والحجات اللي سمعتها عن اللي حصل للبنات..وبعدها 9 ابريل..والحاجات اللي عمالة اقراها علي النت عن اللي بيحصل للناس اللي بتتحاكم عسكري ووالطريقة اللي بيتعاملوا بيها...طب ايه كل ده..جايز في اتقسام في المجلس العسكري..قيادات كويسة وقيادات لا.وفي بينهم صراع عشان كده حبة نلاقي تصرفات حلوة وحبة عنف..مباتش فاهمة حاجة
تاخير محاكمة مبارك ورموز نظامه..بقاء يحيي الجمل..والاعلام اللي زي قبل الثورة
ساعات بقول لنفسي المجلس ادارته للبلد مش اد كده..وفي تباطؤ في اتخاذ القرارات وتفسيره انهم مش شغلتهم يديروا بلد اصلا دول شغلتهم قتال وبس..وبعدين ييجي في دماغي ووهو اصلا مبارك كان متدرب علي ادارة البلد ما هو كان عسكري هو كمان !
انا ليه حكيت كل ده..عشان اقول في ناس واثقة في المجلس ثقة عمياء وده مش صح..لان مفيش حد كامل وهما بشر والخطأ وارد
وناس لا عارفة تخون المجلس ولا عارفة تثق فيه..كل يوم يحصل حاجة تلخبط الواحد
بس اللي وصلت ليه في النهاية..ان المطالب بتتنفذ بالضغط..يعني الشعب لما بينزل في مليونيات مطالبه بتتنفذ.
ورغم كل كلامي اللي فات ده..انا رايي اني مديش حد ثقتي الكاملة مهما كان..علمونا زمان محدش بيعمل حاجتك زي ما انت بتعملها
يعني من الاخر محدش هيحمي ثورتك زي ما انت هتحميها
عشان كل ده.انا مع اننا نفضل نضغط بالنزول للشارع..وناكد علي المطالب..لكن ضد الهتاف ضد الجيش او المطالبة برحيل المجلس
ليه ضد رحيل المجلس؟
لان اغلبية الشعب حاليا بيحب المجلس والجيش وطنطاوي جدا..بيقدسوه..وبئا خط احمر واخضر وفوشيا وكل الالوان..محدش مستحمل يسمع مجرد انتقاد علي اداء المجلس..هتاف ضد الجيش معناه ادام الراي العام خونة وعايزين وقيعة ضد الشعب والجيش
مراعاة الراي العام في تعاملنا مع المجلس مهم لانه هيتقلب علينا وهنكون قلة مندسة بجد!
رايي ننزل نضغط وناكد علي المطالب
1-حد ادني واقصي للاجور
2-المسارعة في محاكمة مبارك ورموز نظامه بس مش عشان الفلوس كمان قتل المتظاهرين
3-محاكمات مدنية للمدنيين.ولا للمحاكمات العسكرية
4-........................ انتو عارفين الباقي
وفي الاخر اتمني ان كل كلامي اللي فات ده يطلع غلط ويطلع كله تمام..ولكنها احلام